សុខភាពមិនបរិបូរណ៍គឺជាមូលហេតុមេជីវិតខ្សោយ

ការសិក្សាស្រាវជ្រាវថ្មីមួយរបស់ព្រឹត្តិបត្រ Fertility និង Sterility បានបង្ហាញថា បញ្ហាសុខភាពទូទៅរបស់បុរសមានការពាក់ព័ន្ធនឹងកត្តាគុណភាពនៃមេជីវិត ឬទឹកកាម។ ចំពោះបញ្ហាចុះខ្សោយមេជីវិតនេះ ក្រុមវេជ្ជបណ្ឌិត បានឲ្យដឹងថា វាអាចស្តែងឲ្យឃើញតាមរយៈអាការសម្ពាធឈាមឡើងខ្ពស់ និងកម្រិតជាតិអ័រម៉ូនខុសប្លែកពីធម្មតា។

ការសិក្សាកន្លងមក បានភ្ជាប់បញ្ហាគុណភាពទឹកកាមទៅនឹងហានិភ័យចំពោះសុខភាព ដូចជា ជំងឺលើសឈាម ជំងឺសើស្បែក និងបញ្ហានៃការចុះខ្សោយអ័រម៉ូន។

ក្រុមវេជ្ជបណ្ឌិត បានបន្តថា បុរសដែលមានវ័យចាប់ពី ៣០ ឆ្នាំទៅអាចប្រឈមនឹងផលប៉ះពាល់ការចុះខ្សោយមេជីវិត ឬងាប់មេជីវិត ដោយសារតែពួកគេមានជំងឺបេះដូង។

លោកសាស្ត្រាចារ្យ ម៉ៃឃែល អ៊ីសិនប៊ើក មកពីសាកលវិទ្យាល័យសុខាភិបាលស្តេនហ្វដ និយាយថា៖ «អត្រាប្រមាណ ១៥ ភាគរយនៃជីវិតប្តីប្រពន្ធដែលមានបញ្ហាពិបាកមានកូននោះ មានអត្រាពាក់កណ្តាលបណ្តាលមកពីទឹកកាមបុរសចុះខ្សោយ។ យើងកំពុងតែយកចិត្តទុកដាក់ទៅបញ្ហាសុខភាពបុរសរាប់លាននាក់ដែលមានបញ្ហាចុះខ្សោយមេជីវិតនេះផងដែរ»។

ម៉ៃឃែល អ៊ីសិនប៊ើក បន្តថា៖ «ប៉ុន្ដែពេលនេះ យើងបានបញ្ជាក់ថា បុរសមានវ័យចាប់ពី ៣០ ឆ្នាំឡើងនឹងប្រឈមបញ្ហានេះ»។

ក្រៅពីនេះ គេបានរកឃើញថា បញ្ហាមេជីវិតចុះខ្សោយរបស់បុរសនេះគួរពិនិត្យលើរាងកាយពួកគេតាមរយៈរោគសញ្ញានៃសុខភាពមួយចំនួនដែរ។

ការសិក្សាថ្មីនេះ បានស្រាវជ្រាវទៅលើក្រុមបុរសប្រមាណ ៩ ៣៧៨ នាក់ មានវ័យចន្លោះចាប់ពី ៣០ ទៅ ៥០ ឆ្នាំ ក្រោមប្រធានបទស្រាវជ្រាវកម្រិតចុះខ្សោយមេជីវិតបុរស។

បុរសទាំងនោះតែងតែផ្ដល់ទឹកកាមគំរូដែលក្រុមអ្នកស្រាវជ្រាវបានវិនិច្ឆ័យលើអាកប្បកិរិយា រួមទាំង សំឡេង ការផ្ចង់អារម្មណ៍ និងសញ្ញាណដែលទឹកកាមរបស់ពួកគេមានសមត្ថភាពអាចបន្លាស់ទីដោយសេរី និងរហ័សរហួន។

៤៤ ភាគរយនៃបុរសទាំងអស់ ដែលមានអាយុ ៣៨ ឆ្នាំជាមធ្យម បានជួបបញ្ហាផ្នែកសុខភាពក្រៅពីអសមត្ថភាពបន្ដពូជដែលត្រូវការការព្យាបាល។

បញ្ហាចម្បង វាកើតពីជំងឺមួយចំនួនចំពោះបុរសមានទឹកកាមខ្សោយ ដូចជា ការឡើងសម្ពាធឈាម ស្ទះសរសៃក្នុងឈាមបេះដូង និងជំងឺបេះដូងជាដើម។

សាស្ត្រាចារ្យ ម៉ៃឃែល បានព្រមានថា៖ «មានបុរសច្រើនណាស់ដែលកើតជំងឺសម្ពាធឈាម ឬលើសឈាមនោះ។ ដូច្នេះត្រូវគិតលើចំណុចមួយនេះឲ្យមែនទែន ពីព្រោះវាបង្កឲ្យមេជីវិតចុះខ្សោយ»។

ប៉ុន្តែលោក វេជ្ជណ្ឌិត ក៏បានបញ្ជាក់ដែរថា អត្រាចំនួន ១៥ ភាគរយបណ្តាលពីកត្តាហ្សែន ដែលវាបានបង្កឲ្យមានផលប៉ះពាល់ដល់ការបង្កើតទឹកកាមនោះ ព្រោះវាមានតួនាទីសំខាន់ពាក់ព័ន្ធផ្ទាល់នឹងរាងកាយ។

ម៉ៃឃែល អ៊ីសិនប៊ើក បន្ថែមថា៖ «បុរសមានសុខភាពល្អ កម្រិតមេជីវិត ឬទឹកកាមរបស់ពួកគេក៏ល្អ។ ដើម្បីឲ្យទឹកកាមនោះមានគុណភាពល្អ បុរសៗក៏ចាំបាច់ត្រូវថែទាំសុខភាពឲ្យបានមាំមួនល្អដែរ។ ពេលយើងព្យាបាលបញ្ហាគ្មានកូនរបស់បុរស ដំបូងយើងក៏ត្រូវការធ្វើតេស្តសុខភាពពួកគេជាមុនសិនផងដែរ»។

ទៅព្យាបាលនៅមន្ទីរពេទ្យជំនាញមានន័យថា យើងមានឱកាសច្រើនដែលធ្វើឲ្យប្រសើរចំពោះស្ថានភាពទូទៅនៃរាងកាយនូវអ្វីដែលយើងធ្លាប់បានសង្ស័យកន្លងមក៕

PrukThmey

Search This Blog